नारायणगढ, चितवन । चितवनको कालिका नगरपालिका-१ लंकालाइनमा प्राङ्गारीक कृषक महेन्द्र प्रसाद पौडेल र चेकमान वाइवाले संयुक्त रुपमा यस वर्ष केरा खेती गरिँदै आएको जग्गामा केरा खेती मासेर तीन बिगाह क्षेत्रफलमा व्यावसायिक सयपत्री फूल लगाएको छ।
उनीहरुले बिगतका वर्षहरुमा करोडौको फूलहरु विदेशबाट आयात भएको देखेर देशलाई फूलमा आत्मनिर्भर बनाउन केही सहयोग पुगोस् भन्ने उद्देश्यका साथ यहाँ फूलखेती गरेको हो ।
कालिका नगरपालिका-५ का स्थानीय बासीन्दा महेन्द्र प्रसाद पौडेल एक प्राङ्गारीक कृषिको अभियन्ता समेत हुन्। उनले यससँगै अन्य स्थानमा विभिन्न तरकारी तथा फलफूलको प्राङ्गारीक खेतीपनि गर्दै आएको छ।
उनी भन्छन्, “बिगतमा केरा खेती गरिँदै आएको एकमुष्ठ जग्गा भाडामा लिएर यसवर्ष सयपत्री फूलको खेती गरेका हौं। किसानको परिश्रमलाई मध्यनजर गरी विदेशी फूलको आयात रोकिएमा हामीले यसबाट सोचेजस्तो आम्दानी लिन सकिन्छ।”
उन्नती कृषि फर्म मार्फत एकै ठाउँमा तीन बिगाह क्षेत्रफल जग्गामा फूल खेती गर्दै आएको बताउँदै उनले यस स्थानमा ६० हजार सयपत्री फूलका बीरुवा रोपेको जानकारी दिए।
पौडेल भन्छन्, “राम्रो बजारीकरण हुन सकेमा एउटा बिरुवाबाट हामीले ३० देखि ४० सम्म लिन सकिन्छ।” संयुक्त रुपमा २ जना मिलेर खेती फूलखेती सुरु गरेको भन्दै उनले यसका लागि करिब ५ लाख ५० हजार लगानी भएको र बजारीकरणमा थप खर्च हुने बताए।
यस बाट उनले १५ लाखको आम्दानी लिन पर्ने आशा व्यक्त गरे। पौडेल भन्छन्, “पहिला केरा खेती गर्दा रसायनिक विषादीको प्रयोगले जग्गा बिग्रेको अवस्थामा थियो यसलाई बिस्तारै सुधार्दै लगेर प्राङ्गारीक तर्फ लैजाने योजना छ।” यस स्थानमा अब सूर्यमुखी फूलको खेती गरिने उनले जानकारी गराए।
त्यसैगरी रत्ननगर नगरपालिका-१५ मा घर भएका कृषक चेकमान वाईवाले यहाँ पौडेलसँग मिलेर पहिलो पटक साझेदारीमा फूल खेती गरेको बताए।
बिगतको वर्षहरुमा भन्दा यस वर्ष चितवनमा फूलखेती अलि बढी मात्रामा गरिएको भन्दै उनले यहाँ उत्पादन भएका फूलहरु स्थानीय बजारमा भन्दापनि काठमाडौ, पोखरा, बुटवल लगायतका शहरमा निर्यात गर्ने गरेको बताए।
उनले स्थानीय पालिकाहरुले पनि केही मात्रामा बजारीकरण तथा खेतीमा सहयोग गरेकोे जानकारी दिँदै उनी भन्छन्, “हाल दैनिक ७/८ क्विन्टल फूलको बिक्री हुँदै आएको छ।” हालसम्मको बिक्रीले लगानी सुरक्षित भइसकेको बताउँदै वाइवाले अव २/३ दिनको बिक्रीबाट हुने आम्दानीबाट नाफा मिल्ने बताए।
प्रकाशित मिति: मंगलबार, कात्तिक २८, २०८० २१:१६
