काठमाडौ । जापानको राजधानी टोकियोमा भइरहेको ३२औँ ग्रीष्मकालीन ओलम्पिक खेलकूदमा नेपाली सुटिङ खेलाडी कल्पना परियारले राष्ट्रिय कीर्तिमान बनाएको छ।
परियारले महिला १० मिटर एयर राइफल स्पर्धाअन्तर्गत केहीबेर अघि भएको खेलमा ६१६ दशमलव ८ अङ्क बनाउँदै राष्ट्रिय कीर्तिमान बनाएको हो।
सो क्रममा उनले पहिलो सिरिजमा १०२ दशमलव दुई, दोस्रोमा १०५ दशमलव चार, तेस्रोमा १०१ दशमलव ०, चौथोमा १०४ दशमलव एक, पाँचौँमा १०३ दशमलव चार तथा छैठौं सिरिजमा १०० दशमलव ७ अङ्क जोडेकी हुन्। सुटिङ खेलाडी परियारले यसअघि नेपालमा भएको १३औँ दक्षिण एशियाली खेलकूद (साग) मा ६१४ दशमलव ५ अङ्क बनाएका थिए। त्यो बेला पनि परियारले महिला १० मिटर एयर राइफलतर्फ राष्ट्रिय कीर्तिमान बनाएको थियो। परियार सागमा चौथो भएको थियो।
सुटिङ खेलाडी परियार टोकियो ओलम्पिकमा छनौट चरणमा ५० खेलाडीमध्ये ४६औँ स्थानमा रहनुका साथै प्रतियोगिताबाट बाहिरिएको छ। परियारले प्रतिस्पर्धा गरेको समूहबाट ८ खेलाडी फाइनल चरणमा प्रवेश गरेका छन्।
नेपाली सेनाको त्रिभुवन आर्मी क्लबकी खेलाडी उनी वाइल्ड कार्ड प्राप्त गर्दै ओलम्पिकमा छनौट भएको हो । सो समूहमा नर्वेकी खेलाडी ६३२ दशमलव ९ अङ्ककासाथ पहिलो, कोरियन खेलाडी ६३१ दशमलव ७ अङ्कसहित दोस्रो तथा अमेरिकी खेलाडी ६३१ दशमलव ४ अङ्कका साथ तेस्रो भएका छन्।
टोकियो ओलम्पिकमा अब पौडीका गौरिका सिंह र एलेक्स शाह, एथलेटिक्सकी सरस्वती चौधरी तथा जुडोकी सोनिया भट्टले प्रतिस्पर्धा गर्न बाँकी नै छ।
सिंहले महिला १०० मिटर फ्रि स्टाइल, शाहले पुरुष १०० मिटर फ्रि स्टाइल, भट्टले महिला ४८ किलो तौल समूह तथा चौधरीले महिला १०० मिटर दौडमा प्रतिस्पर्धा गर्नेछ । टोकियो ओलम्पिक यही साउन २४ गतेसम्म सञ्चालन हुनेछ।
प्रकाशित मिति: शनिबार, साउन ९, २०७८ १२:०२
