काठमाडौं । सूर्य नेपाल गल्फ टुर २०२४-२५ अन्तर्गतको सातौँ प्रतियोगिता सूर्य नेपाल च्यालेन्जको तेस्रो दिन पूर्व नम्बर एक गल्फर शुक्रबहादुर राई ३ स्ट्रोकको अग्रता सहित शीर्षस्थानमा कायमै रहन सफल भएका छन्।
समग्रमा ११-अन्डर १ सय ९३ को स्कोरमा उनले भुवनकुमार रोक्कालाई ३ स्ट्रोकले पछि पारेका हुन् । शुक्रले ५-अन्डर ६३ को सानदार स्कोर निकाले छन्। पहिलो दिन संयुक्तरुपमा शीर्षस्थानमा रहेका भुवनले पनि ५-अन्डर ६३ को स्कोर दर्ज गर्दै समग्रमा ८-अन्डर १ सय ९६ सहित दोस्रो स्थानमा उक्लिएका हुन्।
यो सिजन तीन उपाधि जितिसकेका निरज तामाङले दिनकै उत्कृष्ट ६-अन्डर ६२ को स्कोर गरे। समग्रमा ७-अन्डर १ सय ९७ सहित तेस्रो स्थानमा उक्लिएका छन्।
इभन-पार ६८ खेलेका दिनेश प्रजापति समग्रमा ५-अन्डर १ सय ९९ को स्कोरमा चौथो स्थानमा झरे। समग्रमा ३-अन्डर २ सय १ बनएका तोरण विक्रम शाही पाँचौं स्थानमा छन्। उनले ४-अन्डर ६४ स्कोर जोडे ।
समग्रमा २-अन्डर २ सय २ सहित साबिक विजेता रवि खड्का र सञ्जय लामा संयुक्त रुपमा छैटौं स्थानमा छन्। रविले तेस्रो दिन ३-अन्डर ६५ रसञ्जयले १-अन्डर ६७ को स्कोर गरे। समग्रमा १-अन्डर २ सय ३ स्कोरजोडेका जयराम श्रेष्ठ र वसन्त राज गुरुङले आठौं स्थानमा बाँडे। जयरामले ३-अन्डर ६५ र वसन्तले २-अन्डर ६६ को स्कोर गरे।
यस्तै समग्रमा १-ओभर २ सय ५ को नतिजामा रमेश अधिकारी र भुवन नगरकोटीले दशौं स्थान बाँडे। रमेशले ४-अन्डर ६४ र भुवनले २-अन्डर ६६ को स्कोरकार्ड बनाए। लिडर शुक्रले फ्रन्ट नाइन ३-अन्डर ३१ मा सकाए। उनले पहिलो, दोस्रो, चौथो र आठौं होलमा बर्डी प्रहार गरे।
तेस्रो होलमा भने एक सट खेर फाले। यसपछि ११औं र १२औं होलमा बर्डीको सफलतासँगै ब्याक नाइन २-अन्डर ३२ मा पुरा गरे। भुवनले चौथो होलमा तथा सातौं देखि नवौं होलसम्म लगातार तीन बर्डीप्रहार गर्दै फ्रन्ट नाइन ४-अन्डर ३० मा सकाए।
यसपछि १२औं र १३औंहोलमा एक-एक सट बचाए । १६औं होलको बोगीले ब्याक नाइनमा १-अन्डर ३३ को नतिजा निकाले। दिनकै उत्कृष्ट स्कोर निकालेका निरजले बोगी रहित सानदार प्रदर्शन गरे । उनले फ्रन्ट र ब्याक नाइन दुवै ३-अन्डर ३१ मा सकाए। निरजले पहिलो, दोस्रो, चौथो, १०औं, १३औं र १५औं होलमा बर्डी प्रहार गरे।
एमेच्योरतर्फ समग्रमा १-ओभर २ सय ५ को स्कोरमा राहुल विश्वकर्माले निश्चयजङ्ग रायमाझीलाई ३ स्ट्रोकले पछि पारे। राहुलले इभन-पार ६८ स्कोर गरे। समग्रमा ४-ओभर २ सय ८ स्कोर गरेका निश्चयले आज २-ओभर ७० स्कोर गरे।
७२ होलको चार दिने प्रतियोगितामा ३६ प्रोफेसनल र ११ एमेच्योर गरी कुल४७ खेलाडीको सहभागीता रहेको छ। प्रतियोगिताको कुल पुरस्कार राशी ६ लाख रुपैयाँ रहेको छ । विजेताले १ लाख १० हजार रुपैयाँ प्राप्त गर्नेछन्।
दोस्रो र तेस्रो हुनेले क्रमश ७० हजारर ५० हजार हात पार्नेछन् । साथै शीर्ष २१ भित्र पर्ने प्रोफेसनल गल्फरहरुलेपनि नगद प्राप्त गर्नेछन्। चार दिनको मुख्य स्पर्धा पश्चात शनिबार प्रो-एम प्रतिस्पर्धा हुनेछ।
प्रकाशित मिति: शुक्रबार, जेठ १०, २०८२ ०९:२८
