ओमप्रकाश विष्ट
काठमाडौं । आइसिसी मेन्स टि–२० विश्वकप एसिया एन्ड इएपी छनोटअन्तर्गत बुधबार सम्पन्न पहिलो खेलमा नेपालले कुवेतलाई ५८ रनले पराजित गर्दै शानदार विजयी सुरुवात गरेको छ ।
ओमानको अल अमरित क्रिकेट मैदानमा टस हारेर पहिले ब्याटिङ गरेको नेपालले निर्धारित २० ओभरमा ७ विकेटको क्षतिमा १४१ रनको प्रतिस्पर्धात्मक योगफल खडा गरेको थियो ।
नेपालको सुरुवात भने राम्रो भएन । ओपनर आसिफ शेख ७ बलमा २ रन बनाएर अकिफ फारुकको एलबिडब्लूमा आउट भए । कुशल मल्ल ४ रन र कप्तान रोहित पौडेल १६ रनमा आउट भए । दुवैलाई नवीनराज राजेन्द्रनले बोल्ड गरेका थिए । त्यसपछि आएका सन्दीप जोरा पनि पाँच रनमा आउट हुँदा नेपाल ६३ रनमै चार विकेट गुमाएर नाजुक अवस्थामा पुगेको थियो ।
तर कुशल भुर्तेलले इन्निङ थामे । उनले अन्तिम ओभरको पाँचौँ बलमा अनुदिप चांदमारा बलमा बोल्ड हुनुअघि ५६ बलमा ३ चौका र ३ छक्काको मद्दतमा ६६ रन बनाए । दीपेन्द्रसिंह ऐरीले १९ बलमा २० रन जोडेपछि रनआउट भए ।
नेपालले सुस्त सुरुवातपछि १९औँ ओभरमा उत्कृष्ट प्रदर्शन गर्यो । नवीनराजको ओभरमा भुर्तेलले दुई चौका र गुल्सन झाले तीन छक्का प्रहार गरेपछि सो ओभरबाट २७ रन जोडियो ।
गुल्सन झा अन्तिम ओभरको दोस्रो बलमा अनुदिप चांदमारा बलमा बोल्ड भए । उनले ६ बलमा ३ छक्कासहित २० रन बनाए । नन्दन यादव र सोमपाल कामी क्रमशः २ र १ रनमा नटआउट रहे ।
कुवेतका लागि नवीनराजले ४ ओभरमा ४० रन खर्चेर २ विकेट लिए । उनले पहिलो तीन ओभरमा १३ रन मात्र दिएका थिए, तर अन्तिम ओभरमा २७ रन खर्चन बाध्य भए । अनुदिप चांदमारा ले पनि अन्तिम ओभरमा २ विकेट हात पारे ।
१४२ रनको लक्ष्य पछ्याउँदै आएको कुवेत १८.१ ओभरमै ८३ रनमा अलआउट भयो । कुवेतका ओपनर क्लिन्टो अन्तोले सर्वाधिक २६ रन बनाए । यसिन पटेलले १९ र मीत भास्वरले ११ रन जोडे भने बाँकी ब्याटरहरू दोहोरो अंकमा पुग्न सकेनन् ।
नेपालका लागि ललित राजवंशी, सन्दीप लामिछाने र कप्तान रोहित पौडेलले २–२ विकेट लिए भने सोमपाल कामी, नन्दन यादव र कुशल भुर्तेलले १–१ विकेट आफ्नो नाममा लेखाए ।
यो छनोट प्रतियोगिताबाट शीर्ष तीन टोलीले आगामी वर्ष फेब्रुअरी–मार्चमा भारत र श्रीलंकामा हुने आइसिसी टि–२० विश्वकप २०२६ मा स्थान पक्का गर्नेछन् ।
आजै भएको समूह चरणका अन्य खेलमा ओमानले सामोआलाई हराएको छ भने कतार युएईसँग पराजित भएको छ । नेपाल समूह ‘बी’ मा रहेको छ, जसमा नेपाल, कुवेत र जापान छन् । नेपालले अर्को खेल जापान विरुद्ध सेप्टेम्बर १० गते नेपाली समय अनुसार बेलुकी ४:१५ बजे खेल्नेछ ।
प्रकाशित मिति: बिहीबार, असोज २३, २०८२ ०८:५५
