युवराज कार्की (सन्ताेष)
उदयपुर । उदयपुरमा एक महिलामाथि खुकुरी प्रहार भएको छ । जिल्लाको त्रियुगा नगरपालिका–२, संगम टोलमा बिहीबार बिहान आँगनमै बसिरहेकी एक महिलामाथि उनकै मामा नाता पर्ने व्यक्तिले खुकुरी प्रहार गर्दा उनी गम्भीर घाइते भएकी छन् ।
स्थानीय रबिन्द्र पौडेलको घरको आँगनमा बसिरहेको अवस्थामा सोही स्थानकी २९ वर्षीया सुमा राईमाथि ४३ वर्षीय बिनोद राईले एक्कासि खुकुरी प्रहार गरेको प्रहरीले जनाएको छ । खुकुरी प्रहारबाट सुमा राईको टाउको, ढाड तथा शरीरका विभिन्न भागमा गम्भीर चोट लागेको छ ।
घटनास्थल पुगेका जिल्ला प्रहरी कार्यालय उदयपुरका इन्स्पेक्टर विष्णुबहादुर खड्काका अनुसार घाइते राईको अवस्था चिन्ताजनक रहेको चिकित्सकले बताएका छन् । प्रारम्भिक उपचारपछि उनलाई जिल्ला अस्पताल उदयपुरबाट थप उपचारका लागि न्युरो अस्पताल विराटनगर रिफर गरिएको छ ।
इन्स्पेक्टर खड्काले भने, “खुकुरी प्रहारबाट टाउको र शरीरका विभिन्न भागमा गम्भीर चोट लागेको छ । चिकित्सकका अनुसार अवस्था गम्भीर छ । जिल्ला अस्पतालमा सामान्य उपचारपछि थप उपचारका लागि विराटनगर पठाइएको हो ।”
घटनापछि फरार हुन नपाउँदै आक्रमणमा संलग्न बिनोद राईलाई प्रहरीले तत्काल नियन्त्रणमा लिएको छ । हाल उनलाई जिल्ला प्रहरी कार्यालय उदयपुरको हिरासतमा राखी घटनाबारे थप अनुसन्धान भइरहेको प्रहरीले जनाएको छ ।
प्रहरीका अनुसार आरोपित र पीडितबीच यसअघि पनि गाउँघरका घरायसी विषयमा सामान्य विवाद हुने गरेको प्रारम्भिक अनुसन्धानबाट खुलेको छ । तर, बिहीबार बिहान के विषयमा विवाद चर्कियो र किन खुकुरी प्रहारसम्मको अवस्था सिर्जना भयो भन्ने विषय अझै खुल्न बाँकी रहेको प्रहरीले जनाएको छ ।
इन्स्पेक्टर खड्काले थपे, “पहिलादेखि घरायसी विषयमा सामान्य विवाद हुने गरेको बुझिएको छ । तर, आजको घटनाको वास्तविक कारण खुलिसकेको छैन । हामी विस्तृत अनुसन्धान गरिरहेका छौँ ।”
प्रकाशित मिति: बिहीबार, जेठ ७, २०८३ १५:५०
