काठमाडौं। नेपाली राजनीतिले विलकुलै नेपाली धार र समर्थनलाई आत्मसात गरेपछि नेपाली राजनीतिका मसिहा भन्नेहरु पनि हार मान्न थालेका छन्। उनीहरुले वर्तमान राजनीतिक धार र आम जन समर्थनलाई आत्मसात गरेर त्यसको मूल्याँकन गर्न थालेको पछिल्लो उदाहारण नेपाली कांग्रेसको युवा नेतृत्व हो। गगन थापाको नेतृत्वमा रहेको नेपाली कांग्रेसले वर्तमान नेपाली राजनीति र मूलधारलाई सोधखोज गरेर मूल्याँकन गर्ने कार्य हुन थालेको छ।
त्यसको पछिल्लो उदाहारण नेपाली कांग्रेसका सभापति गगन थापाले वर्तमान सरकारसँग दुर्लभ जनसमर्थन र राजनीतिक बल रहेको भन्दै त्यसलाई आर्थिक रूपान्तरणका लागि प्रयोग गर्न आग्रह गरेको कुराले प्रष्ट पारेको छ। उनले सरकारको लोकप्रियतालाई प्रचारमुखी गतिविधिभन्दा अर्थतन्त्र सुधार, लगानी विस्तार र रोजगारी सिर्जनामा केन्द्रित गर्नुपर्ने बताएका हुन्।
गत शनिबार सानेपास्थित कांग्रेस केन्द्रीय कार्यालयमा आयोजित ‘सुवर्ण शम्शेर इकोनोमिक श्रृङ्खला’ कार्यक्रममा बोल्दै थापाले वर्तमान सरकारलाई विगतका शक्तिशाली सरकारहरूसँग तुलना गरे। उनका अनुसार अहिलेको सरकारसँग २०१५ सालको जस्तो जनसमर्थन र २०४८ सालपछिको जस्तो राजनीतिक अनुकूलता छ।
“अहिले बलियो, लोकप्रिय र जनसमर्थन प्राप्त सरकार छ। यो सरकारले जे गरे पनि हिट हुन्छ— जुत्ता लगाए पनि, चिज खाए पनि,” थापाले भने, “यस्तो जनविश्वास र समर्थन भएको बेला अर्थतन्त्रमा ठूला सुधारका काम गर्नुपर्छ। सहुलियतपूर्ण ऋण प्रणालीमा विश्वास जगाउने, निजी क्षेत्रलाई उत्साहित गर्ने र उत्पादन बढाउने क्षेत्रमा सरकार केन्द्रित हुनुपर्छ।”
थापाको टिप्पणी केही समयअघि प्रधानमन्त्री बालेन शाहले स्वदेशी उत्पादनको प्रवद्र्धनस्वरूप डिडिसीको चिज उपभोग गरेको र गोल्डस्टारको जुत्ता प्रयोग गरेको विषय चर्चामा आएको प्रसंगतर्फ लक्षित थियो। कार्यक्रममा उनले सरकारका सकारात्मक र कानुनसम्मत काममा कांग्रेसले सहयोग गर्ने स्पष्ट पारे। तर संविधान र कानुनी प्रक्रियाभन्दा माथि रहेर काम गर्ने प्रयास भए कांग्रेसले कडा रूपमा आवाज उठाउने चेतावनी पनि दिए। “हामी अनावश्यक आलोचना गर्दैनौं। तर कानुनी शासनको उल्लंघन भयो भने कांग्रेस एकढिक्का भएर उभिन्छ,” उनले भने।
सभापति थापाले सरकारले एकैपटक ठूलो मात्रामा राजस्व वृद्धि गर्ने लक्ष्य राखेको विषयमा पनि शंका व्यक्त गरे। उनले त्यस्तो लक्ष्य पूरा हुने स्पष्ट आधार नदेखिएको उल्लेख गर्दै भविष्यमा असफलताको दोष अरूमाथि थोपर्ने वातावरण बनाउन खोजिएको हो कि भन्ने चिन्ता व्यक्त गरे।
म अर्थमन्त्रीलाई आरोप लगाइरहेको छैन,” उनले भने, “तर यति ठूलो राजस्व वृद्धि कसरी सम्भव हुन्छ भन्ने स्पष्ट आधार देखिएको छैन। बरु पछि ‘हामीले गर्न खोज्यौं, गर्न दिइएन’ भन्ने तर्कका लागि वातावरण तयार पारिँदैछ कि भन्ने आशंका छ।”
थापाले आर्थिक सुधारका लागि लोकप्रियता मात्र पर्याप्त नहुने उल्लेख गर्दै स्पष्ट नीति, संस्थागत विश्वास र कार्यान्वयन क्षमता आवश्यक रहेको बताए। उनका अनुसार अहिले सरकारसँग रहेको जनविश्वासलाई दीर्घकालीन आर्थिक परिवर्तनमा रूपान्तरण गर्न सके मात्र त्यसको वास्तविक सफलता मापन हुनेछ।
प्रकाशित मिति: आइतबार, असार ७, २०८३ ०६:४४
