निडर स्वभाव, कडा व्यवहार, सफा काम, जिम्मेवारी बोध, विना भेदभाव काम गर्ने , काममा आफै खटिने, राजनिति पेशा होइन, समाज सेवा हो र म समाजसेवी नै हुँ, समाजको सेवा गर्न आएको मान्छे अनवरत रुपमा काममा खटिनुपर्छ भन्ने मान्यता राख्नु हुने, परिवर्तनका संवाहक काठमाडौंको नागार्जुन नगरपालिका वडा नम्बर १० का वडा अध्यक्ष सुन्दर बहादुर केसीसंग निशान बुढाथोकीले लिएको अन्तरवार्ताको सारसंक्षेप–
नेपाली कांग्रेसको १४औं महाधिवेशनमा नागार्जुन नगरपालिका वडा नम्बर १० को इकाई सभापति पदमा निर्वाचित हुनुभएको छ, अबका जिम्मेवारी के कस्ता छन् ?
अधिवेशनबाट चुनिएर सभापति भइसकेपछि, नेपाली कांग्रेसको संगठनको सभापति हो। वडा समितिको सभापति हो । अब कसरी अगाडि बढाउने, संगठनको परिचालन कसरी गर्ने, भ्रातृ संगठनलाई परिचालन गर्ने, संगठनलाई कसरी बलियो बनाउने भन्ने नै मुख्य काम हुन्छ–अबका दिनमा।
यो चार वर्षको अवधिमा योजना अनुसार विकास निर्माणका कामहरु कत्तिको भइरहेका छन् ?
वास्तवमा भन्ने हो भने यो चार वर्षको अवधिमा यस वडामा विकास निर्माणका प्रशस्त कामहरु भएका छन्। बजेटको सही सदुपयोग होस् भनेर म आफै फिल्डमा गएर ती कामहरु गरेको अवस्था छ। हामीले काम गर्ने भनेको उपभोक्ता समिति मार्फत हो। त्यो उपभोक्ता समिति पनि कस्तो भने काम गर्दा कुनै पनि किसिमको लापरवाही नहोस् अनि जुन किसिमको आकलन गरिएको हुन्छ त्यो अनुसार काम भएको छ कि छैन त्यसको निरिक्षण चाँही म आफै फिल्डमा गएर गर्ने गरेको छु। सोही अनुसार काम पनि भएका छन्। स्थानिय निकायमा जनप्रतिनिधि आइसकेपछि वडा १० मा करिब ८० प्रतिशत कामहरु भएका छन्। त्यसो त यस वडाको गौरवको योजनामा २ लाख लिटरको ओभर हेडट्यांकी निर्माण कार्य हुँदैछ। यहाँका प्रत्येक सर्वसाधारणको घर घरमा पानी वितरण हुनेछ। सडकको काम पनि भइरहेको छ। सडक चौडा पनि भएका छन्।
म यस वडाको वडा अध्यक्ष मात्र होइन जनताले विश्वास गरेर काम गर्न पठाउनुभएको सेवक हुँ। प्रत्येक कुना कुनामा गएर म स्वंय खटिएर काम गरेको छु। यसरी खटिनु भनेको मेरो आत्म सन्तुष्टि पनि हो। राजनीतिलाई कहिले पनि पेशाको रुपमा हेर्नुृ हुन्न। जबसम्म राजनीतिलाई पेशा बनाइन्छ तबसम्म विकासका कुनै पनि कामहरु गर्न सकिदैनन्। यद्यपि हिजोको ग्रामीण भेग आज विस्तारै शहरीकरण भएको अवस्थामा त्यही अनुसार मानिसहरुको इच्छा र चाहना पनि बढिरहेको हुन्छ। भौतिक पूर्वाधार विकासले मात्र पुग्दैन, आर्थिक समृद्धि र मानसिक सन्तुष्टि पनि चाहिन्छ भन्ने आम मानिसको धारणा रहेको छ।
आर्थिक समृद्धिको लागि कस्ता खालका तालिमहरु दिन सकिन्छ, ती तालिमबाट आमजनताले कसरी आय आर्जन गर्न सक्छन् भन्ने कुरालाई पनि अगाडि बढाएको छु। त्यसो त यहाँका दलित बालबालिकाको लागि पनि छात्रवृत्तिको व्यवस्था गरी निःशुल्क पढाउने व्यवस्था पनि गरेका छौं। यो क्षेत्रका अधिकांश मानिसहरु शिक्षित हुनुहुन्छ। जो शिक्षाबाट पछाडी पर्नु भएको छ उहाँहरुलाई पनि प्रौढ शिक्षा प्रदान गरी साक्षर बनाएका छौं। यस वडा नम्बर १० निरक्षर मुक्त क्षेत्र हो, यसलाई सकारात्मक रुपमा लिन सकिन्छ। स्वास्थ्यको लागि पनि हामी अगाडि नै छौं।
वृद्ध आमा बुवाहरुको लागि निःशुल्क स्वास्थ्य जाँचको व्यवस्था गरेका छौं भने, ल्याबको व्यवस्था पनि छ यस वडामा। यहाँ बस्ने सबै सर्वसाधरणहरुको के कस्ता रोगहरु छन् सबै विवरण राख्ने काम गर्दछ। खानेपानीको पनि सुविधा छ। यसरी हेर्दा नागार्जुन नगरपालिका एउटा नमुना नगरपालिकाको रुपमा स्थापित भएको छ। ४ वर्ष अगाडिको यो ठाउँ र अहिले जनप्रतिनिधि आइसकेपछिको अवस्थामा धेरै परिवर्तन भएको छ। प्रत्येक सडकहरु पिच, ढलान भएका छन्। यहाँका जग्गाहरुको भाउ पनि बढेको छ। आना कै ४० लाखमा विक्री भएको छ। किनभने भौतिक पूर्वाधारको विकासले गर्दा हो। निकट भविष्यमा हामी वडाको प्रोफाइल पनि तयार गर्दैछौं, यसो गर्नाले क कसको घर कहाँ पर्छ, कार्यालय कहाँ पर्छ भन्ने कुरा थाहा हुन्छ।
आय आर्जनको पाटोमा सबल र सक्षम बनाउने खालको तालिम दिने कुरा गर्नु भयो, कस्तो व्यक्तिलाई कस्तो किसिमको तालिम हो यो ?
अब हेर्नुस् म अलि परक खालको छु। साबुन बनाउने तालिम, कुसन बनाउने, बेकरी तालिम, कौसी खेती, पुतली बनाउने, सिलाइ बुनाईदेखि विभिन्न खालका तालिमहरु दियौं। यी तालिमहरु केवल समय बिताउनको लागि मात्र दिएको जस्तो लाग्छ। के ती तालिमहरुले पक्कै पनि ती महिला दिदीबहिनीहरुले आय आर्जनको क्षेत्रमा फड्को मार्नु भएको छ त? बजारसम्म पु¥याउने अवस्था छ त? त्यही कारण अब चाँही नितिगत रुपमा कस्तो व्यक्तिलाई कस्तो तालिम दिने हो? त्यो उहाँहरुबाट आयो भने सहज हुन्छ। को व्यक्ति छ त्यस्तो? जसले तालिम लिएपछि काम गरेर परिवार पाल्न सकोस्। यसको लागि इच्छा शक्ति पनि हुनुपर्छ। यसमा महिला पुरुष जो पनि हुन सक्छ। तालिम लिइसकेपछि म यो काम गर्छु भन्ने भावना पनि हुनुपर्छ। हामीले यस्ता व्यक्ति हरु खोजेर तालिमहरु दिइरहेका छौं।
धेरै वर्ष स्थानिय निकाय जनप्रतिनिधिविहिन भएको अवस्थामा जब निर्वाचित भएर आउनु भयो त्यो अवस्थामा सर्वसाधारणहरु कस्ता खालका समस्याहरु लिएर आउनु भयो?
शुरुमा आउँदा यहाँका सर्वसाधारणहरुले अब त पक्कै परिवर्तन हुन्छ भन्ने विश्वास लिनुभयो। सर्वसाधारणको हरेक किसिमका समस्याहरुलाई समाधान गर्न म अनवरत रुपमा लागिरहेँ र अहिले पनि लागिरहेको छु। सम्बन्ध विच्छेददेखि साँध सिमानाका अधिकांस समस्याहरु लिएर आउनु भयो। म स्थानिय सरकारको प्रमुख भएपनि न्यायालयको प्रमुखको भूमिका पनि निभाएको छु। यहाँ २/३ वटा कस्ता खालका केस आए भने मलाई श्रीमान चाहिदैन वा श्रीमती चाहिदैन भन्ने अवस्थामा पनि उहाँहरुलाई परामर्श दिएर मिलाएको घटना छ। साँध सिमानाका कुरा पनि हामीले मिलाएर सहमति गराएर आएका छौं। काम गर्दा कसैलाई पनि विभेद गरेका छैनौं।
आगामी योजनाहरु के के छन्?
म आफै समाजसेवा गर्छु भनेर यहाँसम्म आएको मान्छे हुँ। पार्टीले मूल्यांकन गरोस् भन्ने लाग्छ। यही बस भने यही बस्न तयार छु। होइन केन्द्र मै जानु पर्छ भने पनि म तयार छु। मुख्य कुरा त जहाँ बसेर काम गरे पनि मूल्यांकन भयो भने सजिलो हुन्छ।
नामी साप्ताहिकबाट साभार
