नेपालको सुदूर पश्चिम प्रदेश अन्तर्गत डडेल्धुरा जिल्ला एउटा सुन्दर जिल्ला हो। यस प्रदेशका ९ वटा जिल्ला मध्ये डोटी, अछाम, बैतडी, दार्चुला, बझाङ र बाजुरा जिल्लामा जाने बाटो यही डडेल्धुरा जिल्ला हुँदै जान्छ। सुदूरपश्चिम प्रदेशको हिल स्टेशनको रुपमा रहेको अनि माथि उल्लेखित ६ वटा जिल्लाको प्रवेश विन्दुको रुपमा रहेको डडेल्धुरा जिल्लाको महत्व सुदूरपश्चिममै बिशेष रहेको छ।
डडेल्धुरा जिल्लाका अजयमेरु गाउँपालिका वडा नम्बर २ का वडा अध्यक्ष शिवराज भट्ट युवा नेता हुन्। फराकिलो सोचका धनी सर्वसाधारण जनताको ढुकढुकी नै बनेका वडा अध्यक्ष शिवराज भट्टसंग नामी साप्ताहिकका लागि निशान बुढाथोकीले लिएको अन्तरवार्ताको सारसंक्षेप–
योजना अनुसार कतिको कामहरु भएका छन् ?
वास्तवमा भन्ने हो भने हाम्रो जस्तो भौगोलिक विकटता भएको गाउँपालिकामा विकास निर्माणका कामहरु प्रशस्त मात्रामा भएका छन्। निर्वाचन हुनु अघि जुन किसिमका प्रतिबद्धताहरु भएका थिए त्यस अनुरुप नै कामहरु भएका छन्।
प्रत्येक वर्ष कामको वर्गिकरण गरेर कामहरु संचालन गर्दै आएका छौं। जसमा आर्थिक विकास तर्फ कृषि र पशुपालन, भौतिक विकास तर्फ खानेपानी, सडक, सिंचाईं सामाजिक विकास तर्फ शिक्षा र स्वास्थ्यमा कामहरु गर्दै आएका छौं। भौगोलिक विकटताका कारण विकास हुन नसकेका कामहरु पनि हामी विस्तारै विकास गर्दै आएका छौं। खानेपानीको कुरा गर्ने हो भने करिब ८० प्रतिशत खानेपानीको काम भएका छन्।
स्थानिय सर्वसाधारणको कस्तो खालको समस्याहरु पाउनुभयो ?
हाम्रो जस्तो विकासोन्मुख देश त्यसमा पनि सुदुरपश्चिमको यो अजैमेरु गाउँपालिका भौगालिक विकटताको कारण हरेक किसिमका समस्याहरु थिए र अझै पनि प्रशस्त मात्रामा समस्याहरु नभएका होइनन्।
विशेष गरी साविकको ७, ८ र ९ मा खानेपानीको चरम अभाव थियो। त्यहाँ मुहानहरु प्नि थिएनन्। तर पनि स्थानिय बासिन्दाको आत्मिय सम्बन्ध, उहाँहरुको साथ र सहयोगले गर्दा त्यस ठाउँमा खानेपानी पुर्याउन सफल भएका छौं। ४० प्रतिशत बस्तीहरुमा बिद्युतिकरण गर्न सफल भएका छौं । त्यसपछि धेरै जसो ठाउँमा सडक संजालले जोड्न पाएका छौं ।
महिलाहरुका लागि कस्तो खालको कार्यक्रमहरु ल्याउनु भएको छ ?
वास्तवमा भन्ने हो भने हाम्रो जस्तो भौगोलिक विकटता भएको ठाउँमा सीपमुलक कार्यक्रम तथा आयमूलक कार्यक्रम सम्बन्धि तालिमहरु दिएर आत्मनिर्भर बनाएका छौं। त्यति मात्र होइन कतिपय महिलाहरु राजनीतिक रुपमा पनि अघि बढ्नु भएको छ। जनचेतनामूलक कार्यक्रमहरु ल्याएर महिलालाई अगाडि बढ्न सहयोग गरेका छौं।
आगामी योजनाहरु के के छन् ?
नेपालका युवाहरु जो विदेश पलायन हुने अवस्था छ । त्यसमा पनि यहाँबाट छिमेकी मुलुक भारत नजिक पर्ने भएकोले भारत पलायन हुनेको संख्या धेरै छ। अब भने नेपालमै स्वरोजगार हुने अवस्था ल्याएर नेपालका युवा नेपालमै आत्मनिर्भर हुने खालका कार्यक्रमहरु ल्याएका छौं। उनीहरुको क्षमता र दक्षता अनुसार तालिम दिएर स्वदेशमै रोजगारी दिने योजना छ।
