ललितपुर । आदिवासी जनजाति मातृभाषामा निर्माण हुने चलचित्रलाई राज्यले छुट्टै दृष्टिकोणले हेर्नु पर्नेमा सरोकारवालाहरुले जोड दिएका छन् ।
नेवाः फिल्म सोसाईटीले ललितपुरमा आयोजना गरेको कार्यक्रमका वक्ताहरुले मातृभाषी चलचित्रलाई पनि मूलधारको नेपाली चलचित्रकै रुपमा नीति लाद्न नहुनेमा जोड दिएको हो ।
कार्यक्रममा बोल्दै आदिवासी जनजाति चलचित्र महासंघका अध्यक्ष अमृत सुनुवारले महासंघकै पहलमा राज्यले बनाएको चलचित्र ऐनमा आदिवासी जनजातिको प्रतिनिधित्त्व सुनिश्चित बनाउन सकेको बताएका छन्।
‘विगतमा राज्यले मातृभाषी चलचित्रलाई देख्दैनथियो, तर अहिले महासंघकै पहल र सक्रियतामा राज्यका चलचित्र सम्वन्धि विभिन्न योजना वा ऐन निर्माण गर्दा जनजाति चलचित्रकर्मीलाई पनि आवद्ध गराउन थालिएको छ’ सुनुवारले भने।
मातृभाषी चलचित्रको निर्माण इजाजत प्राप्त गर्न चलचित्र विकास बोर्डबाट केही सहुलियत सुविधा पाइएता पनि सेन्सर लगायतका प्रक्रिया अझै झन्झटिलो रहेको सुनुवारले बताएका थिए।
यस सम्वन्धमा छुट्टै आदिवासी जनजाति चलचित्र सेन्सर बोर्ड गठन गर्न अथवा हालको सेन्सर बोर्डमा मातृभाषी चलचित्रको लागि छुट्टै ढाँचा बनाउन आफुहरुले माग गर्दै आएको सुनुवारले जानकारी गराएका थिए।
अहिलेको समयमा जनजाति चलचित्रको निर्माणको संख्या बढे पनि लगानी उठाउन ठूलो समस्या रहेको उनले बताएका थिए।
नेवाः फिल्म सोसाईटीले असार १९ देखि २१ गतेसम्म कुमारीपाटी ललितपुरस्थित स्कूल अफ फिल्म मेकिङमा ३ दिने एडभान्स्ड भिडियोग्राफी कार्यशालाको आयोजना गरेको थियो ।
ललितपुरमा एक कार्यक्रमको आयोजना गरी कार्यशालाको समापन गरिएको थियो । उक्त समारोहमा बोल्दै सोसाईटीका अध्यक्ष विराजकाजी राजोपाध्यायले युवाहरु लक्षित यस्ता कार्यक्रमले युवाहरुलाई आदिवासी चलचित्र तर्फ आकर्षित गर्दै आफ्नो कला र आदिवासी सिर्जनामा टेवा पुग्ने विश्वास व्यक्त गरेका थिए।
सोसाइटीले आउँदो श्रावण ६ गते कलाकार भेला कार्यक्रमको आयोजना गर्न लागेको र उक्त भेलाबाट ३ वटा महत्त्वपूर्ण विषयहरुको घोषणा गर्ने अध्यक्ष राजोपाध्यायले जानकारी गराएका थिए।
सोसाईटीका निवर्तमान अध्यक्ष लुःजः सिंहले कार्यशालामा सिकेको सीपलाई व्यवहारमा उतार्दै मातृभाषी चलचित्रलाई पनि सक्दो योगदान दिन आग्रह गरेका थिए ।
आयोजित तीन दिने प्रशिक्षणमा १० जना युवालाई प्रशिक्षक विशाल राजभण्डारीले भिडियोग्राफीका विविध विषयमा प्रशिक्षण दिएको थियो।
समापन समारोहमा महासंघका अध्यक्ष सुनुवारले कार्यशालाका सहभागी साथै प्रशिक्षकहरुलाई प्रमाण पत्र प्रदान गरेका थिए।
प्रकाशित मिति: बुधबार, असार २२, २०७९ २३:२२
