काठमाडौं । 'सीमानामा काँडेतार अभियान' र राष्ट्रिय भावधारामा निर्मित चलचित्र 'काँडेतार' का सम्बन्धमा काठमाडौमा आयोजित एक अन्तर्क्रियात्मक कार्यक्रम सम्पन्न भएको छ ।
अन्तर्क्रियात्मक कार्यक्रम समारोहमा 'सीमानामा काँडेतार अभियान' का संयोजक तथा चलचित्र 'काँडेतार' का निर्माता एवम् नायक नवल खड्काले नेपाल-भारतबीचको सीमालाई व्यवस्थित गर्न काँडेतार लगाउनु पर्ने प्रस्ताव सहित चलचित्र निर्माण गरिएको बताएको हो ।
अभियानका संयोजक, चलचित्र निर्देशक तथा राष्ट्रवादी नायक खड्काले प्रस्ताव पेश गर्दै चलचित्रको निर्माण टिमले विभिन्न राजनैतिक विद्यार्थी संगठनका अध्यक्षहरुसँग छलफल गरि नेपालका लागि खुला सीमाना घातक भएको बताएका हुन्।
"काँडेतार चलचित्रमार्फत हामीले सीमानामा काँडेतार लगाउनुपर्छ भन्ने प्रस्ताव गरेका छौं । हामीले चलचित्रमार्फत राष्ट्र, राष्ट्रियता र सार्वभौमसत्तालाई रक्षा गर्न चाहेका हौं,’ निर्माता एवम् नायक खड्काले भने ।
मुलुकमा देशभक्तिपूर्ण भावनामा बनेका चलचित्र रक्षात्मक स्थितिमा पुगेको वताउँदै भन्दै नायक खड्काले बजारिया चलचित्रको कारण परिस्थिति जटिल अवस्थामा पुगेको बताउँदै हलिउड र बलिउडले चलचित्रको सांस्कृतिक पक्षलाई बुझे पनि नेपाली शासकले नबुझेको उनले आरोप समेत लगाएका छन् ।
अन्तर्क्रियात्मक कार्यक्रम समारोहमा नेपाल पत्रकार महासंघ अध्यक्ष विपुल पोखरेलले चलचित्रले गरेको सीमानामा काँडेतार प्रस्ताव आमनागरिकसामु आएको चुनौती र यसको निर्णय जनताले नै गर्ने बताएका थिए ।
अध्यक्ष पोखरेलले राष्ट्रियताको प्रवद्र्धन गर्ने सवालमा नेपाली पत्रकारिताले सबैभन्दा बढी योगदान दिएको बताउँदै सामाजिक उत्तरदायित्वको सिद्धान्तप्रति आधारित रहेर फिल्म निर्माण हुनुपर्ने उनले बताएका थिए ।
अनेरास्ववियू अध्यक्ष सुनिता बरालले चलचित्रले प्रस्ताव गरेको काँडेतार अभियानमा संगठनको स्वतस्फूर्त समर्थन रहेको जनाउँदै उनले भनिन, ‘सीमाको कारण जमिन गुमाउनेको आँसु मैले देखकी छु । म त्यो परिस्थितिको साक्षी हुँ। ‘राष्ट्रियताको मुद्दामा सबै एकजुट हुनुपर्छ ।’
अनेरास्ववियू अध्यक्ष बरालले ‘समृद्ध नेपाल, सुखी नेपाली’ अभियानमा अघि बढ्न पनि नागरिकलाई सचेत तुल्याउनु पर्ने वताउँदै उनले एकजुट भए मात्र यस्तो अभियान सम्भव हुने बताएकी थिइन् ।
त्यस्तै, अखिल क्रान्तिकारी अध्यक्ष पञ्चा सिंहले राष्ट्रघाती दलाल चरित्रविरुद्ध युवा लड्नु पर्ने वताउँदै काँडेतार अभियानमा संगठनको साथ सधैभरी रहने बताएकी थिइन् भने बाह्य शक्तिले नेपाललाई खेल मैदान बनाउन चाहेको र यसको प्रतिरोध गर्नुपर्नेमा समेत उनले जिकिर गरेकी थिइन् ।
सोही क्रममा नेविसंघ अध्यक्ष दुजाङ शेर्पाले अभियानलाई सबैले समर्थन गर्नुपर्ने बताउँदै भने, ‘काँडेतार अभियान दल विशेषको मुद्दा होइन, देशको मुद्दा हो । जसरी सत्ता र प्रतिपक्षी मिलेर चुच्चे नक्सा पारित गरियो । सीमाको मुद्दामा पनि सबै जना एकजुट हुनुपर्छ,’ उनले भने, ‘यी मुद्दामा नेविसंघ सहकार्य गर्न तयार छ।’
त्यस्तै, आयोजित कार्यक्रमका समारोहस्थलमा अखिल (क्रान्तिकारी) का अध्यक्ष प्रकाश शाहीले राष्ट्रियताको सवालमा सबै एक हुनुपर्ने धारणा व्यक्त गरेका थिए ।
सत्यकला राईको कार्यकारी निर्माण रहेको चलचित्र काँडेतारमा नायक नवल खड्का लगायत कलाकारहरुमा गौरव पहारी, सुरबिना कार्की, रेविका गुरुङ प्रशान्त यादब, मुरलिधर, प्रेम सुब्बा,रोमियन लिम्बू लगायतको मुख्य भूमिका रहेको छ।
चलचित्र काँडेतार अब चाँडै प्रदर्शनको तीव्र तयारीमा रहेको छ । चलचित्र काँडेतारले भारतले नेपाली सीमा अतिक्रमण गरेको मुद्दालाई जोडदार रुपमा आवाज उठाएको छ भने नायक खड्काले यसअघि माया बसेछ, क्रान्ति, आवाज, दशगजा र भीमदत्त जस्ता देशभक्तिपूर्ण चलचित्र निर्माण गरिसकेका छन् ।
