–महादेव त्रिपाठी
(हांस्य कलाकार)
–कलाकारिताको क्षेत्रमा म बाबाको प्रेरणाले लागेको हुँ । सानोमा बाबाले मलाई नाच छोरा नाच भनेर २ रुपैयाँ दिनुहुन्थ्यो । त्यो बेला स्कुलमा खाजा खाने पैसा हुन्छ भनेर म खुसी भएर नाच्ने गर्थे । जसले मलाई कलाकारीताको क्षेत्रमा लाग्न प्रेरणा दियो । खासमा मेरो बाबा नेपाल प्रहरीमा कार्यरत हुनुहुन्थ्यो । उहाँलाई २०५८ सालमा माओवादीले हत्या गरे । म २०६० सालमा सिन्धुपाल्चोकबाट काठमाडौंको अनाथ आश्रममा पुगें।
–काठमाडौमा मैले कहिले टेम्पोमा खलासीको काम गरें भने कहिले बाटोमा प्लास्टिक टिप्ने काम समेत गरें। यसरी काठमाडौंमा भौंतारी रहेको अवस्थामा मैले खुल्ला मञ्चमा भएको एक कार्यक्रममा आफ्नो कला देखाउने मौका पाएँ । त्यही कार्यक्रम र बाबाको प्रेरणाले नै मेरो जीवनलाई नयाँ मोड दियो । त्यही कार्यक्रमबाट नै मैले आफूभित्रको कलाकारीतालाई चिन्ने मौका पाएँ । र त्यसपछि म मा कालकार बन्ने भूत सवार भयो ।
–आज–भोलि म प्रोग्राममा नै व्यस्त छु । केही समय पहिला तराई क्षेत्र डुवानमा परेको थियो धरै जना घरबार बिहीन हुनु भएको थियो सहयोग जुटाउनमा व्यस्त थिएँ । म आफु कलाकार भएको नाताले पनि बाढीपीडितहरुको पीडामा थोरै भएपनि मलमपट्टी लगाउन कार्यक्रमहरु गरेर सहयोग जुटाएँ । हुन त पहिरोले सिन्धुपाल्चोकस्थित मेरो घर पनि भत्किएको छ ।
–तरपनि म राष्ट्रको कलाकार भएको नाताले तराईका बाढीपिडितको पीडालाई नजरअन्दाज गर्न सक्दिन । उनीहरुलाई सहयोग दिन भनेर मैले रत्नपार्क, टुंडिखेल, खुलामञ्च, चक्रपथ, बालाजु लगायतका ठाउँमा कार्यक्रम गरेँ । हाल चाडपर्वको समय भएकोले विभिन्न स्थानमा विभिन्न सांस्कृतिक कार्यक्रममा व्यस्त छु ।
–कलाकारिताको क्षेत्रमा लागेकोमा म एकदम सन्तुष्ट छु । सारा नेपालीले एउटा कलाकार भनेर चिनेका छन् । देश–विदेश घुम्न पाइएको छ । अनि कलाकार भएर मैले मेरो बाबाको सपना पनि पुरा गरेको छु । जसका कारण म असन्तुष्ट हुने ठाउँ नै छैन ।
–म हाँस्य कलाकारका साथै जादुगर समेत भएकाले र मेरा धेरै दर्शकहरुले मलाई जादुगर भनेर चिन्ने हुँदा म जादु नै बढी देखाउँछु । हँसाउने कलाकार त धेरै हुनुहुन्छ तर जादु देखाउने निकै कम छन् । जसका कारण मेरो भागमा जादू नै पर्ने गर्छ ।
–म एउटा हाँस्य कलाकार मात्र नभएर, एउटा डान्सर हुँ, यस्तै जादुगर पनि हुँ । यसैगरी गाउने र उद्घोषण पनि गर्ने गर्छु । जुन धेरै कमले मात्र गर्ने गर्छन् । त्यही भएर दर्शकहरुले मलाई अलि फरक कलाकार भनेर चिन्ने गर्नुहुन्छ ।
–नेपालमा जादूगर निकै कम छन् । म नेपालको पहिलो जादूगर भएकाले पनि यसलाई अघि बढाउनु मेरो दायित्व हो । त्यहि भएर अब म धेरै नेपाली जादूगर जन्माउने अभियानमा लाग्ने सोचमा छु । म आफूले जानेका कुरा हरेक विद्यालयका विद्यार्थीहरुलाई सिकाउँछु । भोलि म मरेर गएपनी मेरो कला नयाँ पुस्ताले जोगाई राखुन् । जसले नेपालमा जादूको विकास त गर्छ नै महादेव त्रिपाठीलाई पनि अमर बनाउनेछ ।
–जादु पहिले मैले नेपालमा कमल कुमार गुरुसँग सिके उहाँ विदेश जानुभयो । त्यसपछी मैले बंगलादेश गएर जादू सिकेको हुँ । म पहिलादेखी स्कुलमा हातहरुको खेला देखाउँथे । बंगलादेशमा सिकेर नेपाल आएपछि अहिले सबैले मलाई नेपालको जादुगर भनेर चिन्नुहुन्छ ।
(नामी साप्ताहिकवाट साभार)
प्रकाशन मिति–२०७९ साल भाद्र २५ गते शनिवार ।
प्रकाशित मिति: शनिबार, भदौ २५, २०७९ ०९:०३
