मोरङ । नेपाली कांग्रेसका केन्द्रीय सदस्य एवं मोरङ निर्वाचन क्षेत्र नं ६ का प्रतिनिधि सभा सदस्य पदका उम्मेदवार डा शेखर कोइरालाले संविधानलाई रक्षा गर्न निर्वाचनमा गठबन्धनले जित्नु पर्ने बताएको छ ।
विराटनगर महानगरपालिकाको जनपथ चोकमा आयोजित कोणसभामा डा कोइरालाले लोकतन्त्रलाई सुदृढीकरण गर्न, भ्रष्टाचारलाई नियन्त्रण र मुलुकमा सुशासन कायम गर्न निर्वाचनमा गठबन्धनले सफलता हासिल गर्नु पर्ने आवश्यकता औँल्याएकाे हाे ।
डा कोइरालाले शिक्षाविना समाज र राष्ट्र सभ्य हुन नसक्ने भएकाले नेपाली कांग्रेसले शिक्षालाई उच्च प्राथमिकता राखेको बताउँदै नेपाली कांग्रेसको नेतृत्वमा सरकार बनेमा मुलुकमा विकास हुने र वेथिति हट्ने विचार राखेका थिए।
डा कोइरालाले भने, ‘ कोखदेशि शोकसम्म’ नेपाली कांग्रेसले योजना बनाई कार्यान्वय गर्ने भन्दै गरिबलाई शोकमा रु.१० हजारसम्म क्रिया खर्च दिने उद्घोष गर्दै उनले नेपाली कांग्रेसले सुत्केरी भत्तादेखि ज्येष्ठ नागरिकको उपचारलाई व्यवस्थित गर्ने धारणा पनि राखेका थिए ।
राष्ट्रिय सभाका सदस्य एवं नेकपा माओवादी केन्द्रका नेता गोपी अछामीले मुलुकमा विकास र समृद्धिको यात्रा पूरा गर्न गठबन्धनका उम्मेदवार जित्नु पर्ने बताए ।
प्रदेश सभा निर्वाचन क्षेत्र नं ६ ‘ख’का उम्मेदवार केदार कार्कीले विराटनगरलाई संरचना सहितको राजधानी बनाउने भएकोले गठबन्धनले जित्नु पर्ने बताए ।
उनले विराटनगरको चक्रपथ, केशल्यानदीलाई व्यवस्थित गर्न कुनै कसर बाँकी नराख्ने भन्दै मतदाता र मतदाता शिक्षालाई व्यवस्थित गर्न कार्यकताहरुलाई निर्देशन दिए ।
प्रकाशित मिति: बुधबार, कात्तिक १६, २०७९ १६:४०
