काठमाडौ । संस्कृति, पर्यटन तथा नागरिक उड्डयनमन्त्री सुदन किरातीद्वारा रचित शब्दमा ‘पहराकी फुल’ विमोचन भएको छ।
मन्त्री किरातीले सांस्कृतिक प्रतिरोध दिवसका अवसरमा म्युजिक भिडियो विमोचन गरेको हो । उनले आफ्नो गाउँको सम्झनामा गीत लेखेको बताए।
मन्त्री किरातीले भने, “संयोग पनि माला जस्तै रहेछ, एउटा चुँडियो भने सबै भुइँमा झर्ने । हवाई जहाजमा हिँड्दा हिँड्दै गाउँको याद धेरै आयो । त्यही बेला लेखेको गीत हो यो, अहिले पदीय जिम्मेवारीमा रहँदा विमोचन गर्ने अवसर मिल्यो ।”
विमोचन कार्यक्रमका अवसरमा मन्त्री किरातीले आज सांस्कृतिक प्रतिरोध दिवसका अवसरमा शहीदहरुको योगदानको स्मरणसमेत गरे ।
“आजकै दिन काभ्रेको अनेकोटमा च्याङ्बा लामासहित चार जना कलाकारले सहादत प्राप्त गर्नुभएको थियो । उहाँहरुको सम्झना र सम्मानमा यो गीत सार्वजनिक गरिएको हो,” उनले भने ।
‘पहराकी फुल’ गीतको म्युजिक भिडियो कलाकारहरुमा दयाहाङ राई, वेदना राई र मनिता जाइका वान्तावा रहेको छ भने सङ्गीतकार शान्तिराम राई, गायक रुपकुमार राई र निर्देशन किरण चाम्लिङकाे रहेको छ ।
त्यस्तैगरी भिडियाेकाे सम्पादन अनिल रानाले गरेका हुन् भने छायाड्कन भुपेन्द्र तुम्वाहाम्फेकाे रहेकाे छ ।
प्रकाशित मिति: आइतबार, चैत ५, २०७९ १९:५२
