काठमाडौं । बागमती प्रदेशकाे गाउँ-गाउँमा रहेका गायन तथा नृत्य प्रतिभाहरुका लागि देशमै पहिलो पटक रियालीटी शो आयोजना गर्ने भएको छ।
एएनपी मिडिया हाउसले बालबालिकामा अन्तरनिहित गायन र नृत्य प्रतिभालाई बाहिर ल्याउनका लागि पहिलो पटक बागमती गट ट्यालेन्ट सिंगिङ एन्ड डान्सिङ रियालीटी शोका नाममा गायन र नृत्यको रियालीटी शो आयोजना गर्न लागेको हो।
आयोजक संस्था एएनपी मिडिया हाउसका सिइयो लबबहादुर कार्कीका अनुसार, शहर केन्द्रित रियालीटी शो भईरहेको समयमा गाउँ-गाउँका अवसरबिहीन गायन र नृत्य प्रतिभालाई अवसर र मञ्च प्रदान गर्नका लागि यो रियालिटी शो आयोजना गर्न लागिएको हो।
यसका लागि वागमती प्रदेशका धादिङ, चितवन, मकवानपुर, काभ्रेपलाञ्चोक, मन्थली, सिन्धुली, भक्तपुर र काठमाडौंमा चरणवद्धरुपमा अडिसन गरिने भएको छ।
नौ स्थानको अडिसनबाट चुनिएका प्रतिभालाई काठमाडौंमा ल्याएर डिजीटल अडिसन गरिने छ भने त्यसबाट चुनिएकाहरुलाई रियालीटी शोमा सामेल गरिने छ।
रियालीटी शोको अन्तिम स्पर्धाबाट गायन र नृत्य विधामा विजयी बागमती गट ट्यालेन्टलाई पुरस्कारस्वरुप जनही नगद एक लाख रुपियाँ तथा फस्ट रनर्सअपलाई जनही ३० हजार र सेकेन्ड रनर्सअपलाई जनही २० हजार रुपियाँ प्रदान गरिने जनाएको छ।
अडिसनको शुरुवात धादिङबाट भईसकेको छ। रियालीटी शोमा आठदेखि १३ वर्षका बाल प्रतिभालाई सामेल गराइएको छ।
बागमती गट ट्यालेन्ट सिंगिङ एन्ड डान्सिङ रियालीटी शो ख्यातिप्राप्त अभिनेत्रीद्धय मिथिला शर्मा र गौरी मल्ल तथा ख्यातिप्राप्त गायक गायिकाद्वय आनन्द कार्की र देविका वन्दनाको मार्गदर्शनमा हुन लागेको हो ।
अभिनेत्री मिथिला शर्माले यो रियालीटी शो गायन र नृत्यको क्षेत्रका लागि नयाँ आयाम हुने बताइन् । अभिनेत्री गौरी मल्लले यसबाट देशले नव प्रतिभा पाउने विश्वास गरिन् ।
गायक आनन्द कार्कीले लुकेर रहेका प्रतिभाका लागि यो सुनौलो अवसर हुने बताए। गायिका देविका बन्दनाले गाउँ-गाउँमा लुकेर रहेका प्रतिभा यो रियालीटी शोबाट बाहिर आउने विश्वास व्यक्त गरिन् ।
प्रकाशित मिति: शुक्रबार, वैशाख २९, २०८० २१:५१
