काठमाडौं। दुई दशकअघि नेपाली कथानक चलचित्र ज्वालामा पासिङ सटमा देखिएका मध्यपुर थिमि नगरपालिका वडा नंबर ४ दथुटोलका कलाकार सुरेन्द्र श्रेष्ठलाई कलाकारिताको मोह त्यतिबेला पनि खासै जागेको थिएन।
ललितपुरका कलाकार महेश श्रेष्ठको प्रेरणावाट कला र कलाकारितामा जम्न उत्प्रेरणा पाएपछि कम्मर कसेर लागेका सुरेन्द्रले प्रारम्भमा नेपाली चलचित्र तथा नेपाली गीतका म्युजिक भिडियोहरुमा नायक होइन, खलनायकवाट कलाकारिता शुरु गरेका थिए।
हिम आँधी, बहिदार बाबु, बज्र संकल्प, निलकमल, सम्झौता जस्ता चलचित्र तथा सिरियलहरुमा अभिनय गरेर साइलेन्ट मुडमा रहेका सुरेन्द्रलाई खलनायकवाट नायक वनाउने युगिन निर्देशकको नाम पवन जोशी हो।
पवन जोशीको निर्देशनमा निर्मित नेपालभाषाको म्युजिक भिडियो दागबतीमा पहिलो पल्ट नायकको भूमिकामा ब्रेकपाएपछि नायकमा जमेका कलाकार सुरेन्द्र श्रेष्ठको कलाकारितामा नयाँ आयाम थपेको हो। जसलाई कलाकार श्रेष्ठले आफ्नो टर्निङ प्वाइन्ट भन्न चुकेन।
यद्यपि, नेपालभाषमा नै निर्मित च्वपु फैं,धुँवल, धौंबजी,तपलय लगायतका चलचित्रहरुमा खलपात्रकै भूमिका निर्वाह गरेर साइलेन्ट किलर कलाकार बनेका उनको भाषामा कलाकार भएपछि हरेक भूमिकामा स्वभाविकता दिनसक्नु पर्दछ। यही नै कलाकारको सही कलाकारिता हो।
प्रकाशित मिति: शुक्रबार, वैशाख २९, २०८० २२:५५
