काठमाडौं। बादलुको घुम्टोले इलाम बजार छोपिदा मैले सवलाई विर्से–तिमीलाई सम्झदा जस्ता दर्जनौ दर्जन कालजयी गीतका ख्यातिप्राप्त गायक यम बरालको एकल सांगीतिक साँझ हुने भएको छ। लायन्स क्लब अफ सिद्धार्थ एभरग्रीनको आयोजनामा यही कात्तिक १८ गते नेपाल प्रज्ञा प्रतिष्ठानको हलमा ‘यम बराल : हिस्टोरिकल सोलो लाइभ इन कन्सर्ट’ हुने भएको हो।
आयोजक संस्था लायन्स क्लब अफ सिद्धार्थ एभरग्रीनका व्दितीय उपाध्यक्ष सविता ढकालले दिएको जानकारी अनुसार, यम बराल : हिस्टोरिकल सोलो लाइभ इन कन्सर्ट’ कार्यक्रमबाट उठेको रकम सामाजिक कार्यअन्तर्गत क्यान्सर पीडित गायिका जमुना थापाको उपचारार्थ र लुलसादेवी फाउन्डेसन, ललितपुरद्वारा सञ्चालित अनाथालयलाई सहयोग गर्ने भएको छ। सांगीतिक कार्यक्रमलाई सामाजिक कार्यमा लगानी गर्ने मूल उदेश्यले ‘यम बराल : हिस्टोरिकल सोलो लाइभ इन कन्सर्ट’गर्न लायन्स क्लब अफ सिद्धार्थ एभरग्रीन क्रियाशील भएको जानकारी पनि व्दितीय उपाध्यक्ष ढकालले दिएकी छन्।
ढकालले दिएको जानकारी अनुसार, तीन दशकभन्दा लामो समयदेखि नेपाली संगीत क्षेत्रमा सक्रिय गायक बराल झण्डै २५ वर्षपछि एकल साँझमा गुञ्जिन लागेका हुन् । दुई चरणको प्रस्तुति रहने कार्यक्रमा पहिलो भागमा गायक बरालले आफ्ना लोकप्रिय सुगम संगीतमा आधारित गीतहरु गाउनेछन् भने दोस्रो भागमा रमाइला गीतहरुको प्रस्तुति रहनेछ।
गायक बरालले यो कार्यक्रमका लागि लायन्स क्लबसँग सहकार्य गर्न पाउँदा आफू हर्षित रहेको भनेका छन् । ‘लायन्स क्लबको सामाजिक कार्यममा संगीतमार्फत जोडिन पाउँदा अत्यन्तै हर्षित छु । डेढ घण्टासम्मको कार्यक्रम ऐतिहासिक हुने विश्वास छ,’ उनले भने ।
एकल कन्सर्टमा उनले आफ्ना नयाँ(पुराना चर्चित दुई दर्जनभन्दा बढी गीत लाइभ ब्याण्डमा प्रस्तुत गर्नेछन् । २०४७ सालमा रेडियो नेपालमा ‘सागरभन्दा गहिरो’ बोलको गीत गाएर नेपाली संगीतमा पाइला चालेका यम बराललाई ‘बादलुको घुम्टो’ गीतले परिचित बनायो । त्यसपछि निष्ठुरीले छाडेर गइहाली, अब चोटहरुले, मन रहे पो मायाप्रीति, तिम्रो हाम्रो चिनारी, दिलमाया दिलमायालगायत गीत चर्चित छन् । उनले १०० भन्दा बढी नेपाली फिल्ममा पार्श्व गायनसमेत गरेका छन् ।
हालसम्म एक हजार बढी गीतमा स्वर दिएका उनी गोरखा दक्षिणबाहु चौथो, नारायणगोपाल पुरस्कार, छिन्नलता पुरस्कार, विभिन्न अवार्डलगायतबाट सम्मानित भइसकेका छन् । कन्सर्टले सामाजिक सशक्तीकरण, सामाजिक जिम्मेवारी र सांस्कृतिक प्रवर्द्धनमा समेत प्रेरणा दिन सहयोग पुग्ने अपेक्षा रहेको आयोजक लायन्स क्लब अफ सिद्धार्थ एभरग्रीनकी अध्यक्ष कल्पना बस्नेतले बताइन्।
प्रकाशित मिति: शनिबार, कात्तिक ४, २०८० १३:४३
