नवलपुर, नवलपरासी । नेपाली महिलाहरुको महान् पर्व हरितालिका तीजको मौलिकता संरक्षणका लागि नवलपुरको गैँडाकोटका महिलाहरु जुटेका छन्।
पार्टी प्यालेसमा भोजभतेर गर्दै स्पिकरमा गीत बजाएर नाच्ने प्रचलन बढ्दै गएको अवस्थामा यहाँका महिलाहरुले मौलिकता जोगाउने गरी तीजको रमाइलो गरेका छन्।
गाउँका महिलाहरु जम्मा भएर मादल बजाउँदै नाच गान तथा दर खाएर तीजमा रमाइलो गरेको गैँडाकोट-५ काँग्रेसचोककी मनु ढुङ्गाना शर्माले बताईन्।
तीजमा बढ्दो विकृतिका विरुद्धमा आफूहरुले गाउँमै जम्मा भएर रमाइलो गरी तीज मनाएको ढुङ्गानाको भनाइ छ। मौलिक संस्कृतिको विरुद्धमा गएर तीज मनाउनु सान्दर्भिक नहुने भन्दै संस्कृतिको संरक्षण गर्नुपर्नेमा उनले जोड दिईन्। पहिले र अहिले गाउने गीत र तीज मनाउने प्रचलनमा निकै भिन्नता देखिएको पनि उनले बताईन् ।
पारिजात आमा समूहकी सचिव तारा शर्माले अहिले तीज भड्किलो हुँदै गइरहेको बताईन। “तीज भनेको दिदीबहिनीहरु भेट भएर, बसेर, गीत गाउँदै दुःखसुख बाँड्ने एउटा माध्यम हो” उनले भनिन्, “अहिले यो संस्कृतिमा विकृति आएर एक महिना अगाडिदेखि नै पार्टी प्यालेसमा मनाउने, मादक पदार्थ पिउने र परिवारसँग बसेर सुन्नै नसकिने खालका तीजका गीतसमेत बजारमा आएका छन्।” तीजको मौलिकता संरक्षण गर्नका लागि समयअनुकुल दिदीबहिनी भेला भएर रमाइलो गर्दै दुःखसुख साटासाट गर्नुपर्ने शर्माको भनाइ छ।
केही वर्षदेखि तीज मनाउने पद्धतीमा भित्रिएको विकृतिविरुद्ध पछिल्ला केही वर्षदेखि शिक्षा र चेतनाका कारण मौलिक संस्कृतिप्रति आकर्षण बढ्दै गएको छ । समाजमा चेतनाको वृद्धिले मौलिकता झल्काउने गरी सांस्कृतिक पर्वहरु मनाउने क्रम बढ्दै गएमा नेपाली संस्कृति साँच्चै नै लोकप्रिय बन्ने थियो ।
प्रकाशित मिति: बिहीबार, भदौ १३, २०८१ २२:२८
-1777773700.jpg)
