काठमाडौं । पूर्व नम्बर एक गल्फर शुक्रबहादुर राई सूर्य नेपाल गल्फ टुर २०२४-२५ अन्तर्गतको सातौँ प्रतियोगिता सूर्य नेपाल च्यालेन्जको उपाधि कोर्स रेकर्ड सहित जित्न सफल भएका छन्।
समग्रमा १७-अन्डर २ सय ५५ को प्रभावशाली स्कोरमा शुक्रले निरज तामाङलाई ४ स्ट्रोकले हराउँदै उपाधि आफ्नो नाममा लेखाएको हो।
शुक्रले एमेच्योर खेलाडी सदभाव आचार्यको नाममा रहे को १५-अन्डर ५७ को रेकर्ड तोडेका हुन्। सदभावले यही सिजन सूर्य नेपाल काठमाडौँ ओपनमा सो रेकर्ड बनाएका थिए।
अन्तिम दिन ६-अन्डर ६२ को स्कोर बनाएका शुक्रले उपाधिसँगै नगद १ लाख १० हजार प्राप्त गरे। उनको यो करियरको एघारौं उपाधि हो। यो सिजन तीन उपाधि जितेका निरजले आज ६-अन्डर ६२ को स्कोर जोडे। समग्रमा १३-अन्डर २ सय ५९ को स्कोरमा निरज दोस्रो भए। उनले नगद ७० हजार हात पारे।
समग्रमा ८-अन्डर २ सय ६४ को स्कोरमा दिनेश प्रजापतिले तेस्रो स्थानमा प्रतियोगिता सकाए। आज उनले ३-अन्डर ६५ को स्कोर दर्ज गरे। तेस्रो भएका उनलाई ५० हजार प्रदान गरिएको छ।
आज १-ओभर ६९ स्कोर सहित समग्रमा ७-अन्डर २ सय ६५ को नतिजामा भुवन कुमार रोक्का चौथो हुँदा ४२ हजार प्राप्त गरे। समग्रमा ५-अन्डर २ सय ६७ सहित सञ्जय लामा पाँचौं भए। उनले आज ३-अन्डर ६५ को स्कोर तयार पारे। उनले ३७ हजार नगर पुरस्कार आफ्नो नाममा लेखाए।
तोरण विक्रम शाही, साबिक विजेता रवि खड्का र वसन्त राज गुरूङले समग्रमा ४-अन्डर २ सय ६८ सहित संयुक्तरुपमा छैटौं स्थान बाँडे। उनीहरूलाई जनही ३० हजार प्राप्त गरे।
समग्रमा १-अन्डर २ सय ७१ बनाएका नेपाल नम्बर एक भुवन नगरकोटीले नवौं स्थानमा चित्त बुझाए। आज उनले २-अन्डर ६६ स्कोर गरे। समग्रमा २-ओभर २ सय ७४ सहित रमेश अधिकारी दशौं भए। भुवनले २४ हजार र रमेशले २१ हजार हात पारे।
अन्तिम १८ होलको सुरूवात गर्दा आज शुक्रसँग ३ स्ट्रोकको अग्रता रहेको थियो। उनले दोस्रो देखि पाँचौं होलसम्म लगातार चार बर्डी प्रहार गरे। उनलाई अन्य खेलाडीले चुनौती समेत दिन सकेनन्। फ्रन्ट नाइन ४-अन्डर ३०मा सकाए। यसपछि ५-पारको १० औं होलमा इगलको सफलता प्राप्त गरे।
१३ औं र १४औं होलमा एक/एक सट बचाए । १२औं र १८औं होलमा बोगी खेप्दै ब्याक नाइन २-अन्डर ३२ मा सकाए। निरजले पहिलो, चौथो र पाँचौं होलमा बर्डी प्रहार गर्दा सातौं होलको बोगीले फ्रन्ट नाइन २-अन्डर ३२ मा पुरा गरे।
यसपछि १०औं होलमा इगल तथा १२औं र १८औं होलको बर्डीले ब्याक नाइनमा ४-अन्डर ३० को नतिजा निकाले। दिनेशले फ्रन्ट नाइन १-अन्डर ३३ र ब्याक नाइन २-अन्डर ३२ मा सकाए। उनले पहिलो, चौथो सातौं, एघारौं र १६ औं होलमा एक/एक सट बचाए।आठौं र नवौं होलमा बोगी खेपे।
एमेच्योरतर्फ समग्रमा ३-ओभर २ सय ७५ सहित राहुल विश्वकर्माले निश्चय जङ्ग रायमाझीलाई एक स्ट्रोकले हराउँदै उपाधि जिते। समग्रमा ४-ओभर २ सय ७८ सहित निश्चय दोस्रो भए। दुवैले आज २-ओभर ७० मा खेल सकाएका थिए।
७२ होलको चार दिने प्रतियोगितामा ३६ प्रोफेसनल र ११ एमेच्योर गरी कुल ४७ खेलाडीको सहभागीता रहेको थियो। कुल ६ लाख नगद पुरस्कार राशी रहेको प्रतियोगितामा शीर्ष २१ भित्र पर्ने प्रोफेसनल गल्फरहरुले पनि नगद प्राप्त गरे।
विजयी खेलाडीहरुलाई सूर्य नेपाल प्रालिका डेपुटी जनरल मेनेजर (मार्केटिंग) केशव प्रधान, एनपिजिएका अध्यक्ष रविन्द्रमान श्रेष्ठ, एनपिजिएका सल्लाहकार घनश्याम थापा, नेपाल गल्फ संघका अध्यक्ष टासी घले र रोयल नेपाल गल्फ क्लबका क्याप्टेन मिथुन राईले पुरस्कार वितरण गरे।
प्रतियोगिताको अन्तिम दिन शनिबार प्रो-एम प्रतिस्पर्धा हुनेछ, जसमा एमेच्योर खेलाडीले प्रोफेशनल गल्फरसँग खेल्ने अवशर प्राप्त गर्नेछन।
याे पनि :
सूर्य नेपाल च्यालेन्ज : शुक्रको अग्रता कायमै
