झापा । झापा जिल्ला शिवसताक्षी नगरपालिका-५ अन्तर्गत रहेको श्री सूर्योदय आधारभूत विद्यालयले ४३ औँ वार्षिकोत्सव विभिन्न कार्यक्रम गरेर सम्पन्न गरेको छ ।
विद्यालयको ४३ औँ वार्षिकोत्सव औपचारिक रुपमा २०८२ माघ २९ गतेदेखि सञ्चालित सप्ताहव्यापी कार्यक्रम भब्य र सभ्य रुपमा सम्पन्न भएको हो।
शिक्षिका देवीमाया बास्तोलाले सञ्चालन गरेको कार्यक्रममा प्रधानाध्यापक जगतवीर लिम्बुको विशेष भूमिका रहेको थियो भने सम्पूर्ण शिक्षक तथा शिक्षिकाहरूले आ-आफ्नो जिम्मेवारीमा तल्लिन रहि कार्यक्रमलाई सफल पारेको विद्यालय प्रशासनले जनाएको छ।
विद्यालय व्यवस्थापन समितिका अध्यक्ष देवीकुमार प्रधानको सभापतित्वमा भएको उक्त कार्यक्रममा प्रमुख अतिथि शिवसताक्षी नगरपालिकाका मेयर मेगाहाङ थोप्रा, विशिष्ट अतिथि प्रशासकीय अधिकृत सुनिता तुम्बाहाम्फे विशिष्ट अतिथि नगर शिक्षा युवा तथा खेलकुद शाखा प्रमुख छविलाल ढकालकासाथै विशिष्ट अतिथि शिवसताक्षी नगरपालिका-५ का वडाअध्यक्ष सिक्किम पासवानको उपस्थिति थियो।
विद्यालय व्यवस्थापन समितिका सम्पूर्ण पदाधिकारी, अभिभावक सङ्घका सम्पूर्ण सदस्य, चन्दादाता, जग्गादाता, सम्पूर्ण अभिभावक, पूर्व विद्यार्थी, सम्पूर्ण विद्यार्थीहरू समाजसेवी बुद्धिजीवीहरुको उपस्थितिमा कार्यक्रम सम्पन्न भएको थियो।
अभिभावकका मनोरञ्जनात्मक खेलहरू, शिक्षकहरू बीच दौड प्रतियोगिता, विद्यार्थी भाइबहिनीहरूका खेल सप्ताह अन्तर्गत विभिन्न खेलहरु गराई प्रतिस्पर्धामा सफलता प्राप्त गर्ने विद्यार्थीहरूलाई पुरस्कार वितरण गरिएको थियो। बालबालिकाहरूले आकर्षक नृत्य प्रदर्शन गरेका थिए।
विद्यालयमा सर्वोकृष्ट उपस्थिति विद्यार्थीहरूलाई नगद पुरस्कारको व्यवस्था भएको थियो। साथै विद्यालय प्रथम दोस्रो तेस्रो विद्यार्थीहरूलाई कक्षा १, ३, ४ र ८ दुई तहमा मूल्याङ्कन गरी नगद पुरस्कारले विद्यार्थीहरूलाई पुरस्कृत गरिएको थियो।
त्यस्तै, स्काउट विद्यार्थीहरूले आफ्नो कलाकौशल प्रदर्शनी गर्नुका साथै उपस्थित अतिथि गणलाई स्वागत गरेका थिए। विद्यालयले स्थापनाकालदेखि अहिलेसम्म आउँदा धेरै बालबालिकाहरूलाई शिक्षा दिइसकेको छ। २०३९ सालमा शिक्षाप्रेमी, बुद्धिजीवी, स्थानीय अभिभावकहरूले आफ्नै बलबुता र दानचन्दाबाट विद्यालय स्थापना भएको थियो।
भौतिक तथा शैक्षिकक्षेत्रमा विद्यालयलाई आमूल परिवर्तन गराउन दिलो ज्यान दिएर लाग्नुहुने र स्थानीय व्यक्तित्वहरूकै कारणले आज विद्यालय सेवा क्षेत्रभित्रका बालबालिकाहरूले शिक्षा लिने अधिकार सुनिश्चित गरेको अनुभव साटासाट गर्न पाएकोमा सवैले मुक्तकण्ठले प्रशंसा गरेका थिए।
याे पनि :
नामी साप्ताहिक
प्रकाशित मिति: शनिबार, फागुन ९, २०८२ ०८:३१
