उदयपुर । उदयपुरको कटारी नगरपालिकामा गुडिरहेको स्कुल बसबाट खस्दा एक सह–चालकको मृत्यु भएको छ। घटनापछि शव व्यवस्थापनलाई लिएर अस्पतालमा विवाद उत्पन्न हुँदा अस्पतालका प्रमुख चिकित्सकमाथि गालीगौज र कुटपिट प्रयास भएको आरोपसमेत लागेको छ।
सोमबार बिहान कटारी नगरपालिका–१ बेलसोततर्फ विद्यार्थी लिन जाँदै गरेको सौगात एकेडेमी बोर्डिङ स्कुलको लु.प्र.०१–००१ ख ०९८५ नम्बरको स्कुल बसबाट सह–चालक अचानक ढोकाबाट खसेर गम्भीर घाइते भएका थिए। दुर्घटनामा कटारी नगरपालिका–२ निवासी अन्दाजी ३१ वर्षीय उत्तम थापा गम्भीर घाइते भएको जिल्ला प्रहरी कार्यालय उदयपुरले जनाएको छ।
जिल्ला प्रहरी कार्यालय उदयपुरका इन्सपेक्टर विष्णुबहादुर खड्काका अनुसार शरीरका विभिन्न भागमा गम्भीर चोट लागेका थापालाई तत्काल उपचारका लागि प्रादेशिक अस्पताल कटारी लगिएको थियो। तर उपचारकै क्रममा उनको मृत्यु भएको प्रहरीले जनाएको छ।
दुर्घटनापछि बस र चालक कटारी नगरपालिका–२ निवासी ४८ वर्षीय छत्रबहादुर कार्कीलाई प्रहरीले नियन्त्रणमा लिई अनुसन्धान अघि बढाएको छ। इलाका प्रहरी कार्यालय कटारीका डीएसपी उमेन्द्र खरेलले घटनाबारे थप अनुसन्धान भइरहेको र अस्पतालमा देखिएको विवाद समाधानका लागि छलफल भइरहेको बताए।
शव व्यवस्थापनमा समस्या, अस्पतालमा तनाव
मृतकको शव पोस्टमार्टमका लागि प्रादेशिक अस्पताल कटारी ल्याइएपछि शव सुरक्षित राख्ने व्यवस्थाको अभावले अस्पतालमा तनाव सिर्जना भएको थियो। अस्पतालमा शव राख्ने कुलिङ प्रणाली प्रभावकारी नभएको भन्दै मृतकका आफन्त र स्थानीयले विरोध जनाएका थिए। केही समय शव अस्पतालको इमर्जेन्सी कक्षमै राखेर नाराबाजीसमेत गरिएको थियो।
घटनाले अस्पतालको पोस्टमार्टम तथा शव व्यवस्थापनसम्बन्धी आधारभूत पूर्वाधारको अवस्थामाथि प्रश्न उठाएको छ। स्थानीयले शवगृहको भौतिक अवस्था कमजोर रहेको, पोस्टमार्टम कक्ष व्यवस्थित नभएको तथा शव संरक्षणका लागि आवश्यक उपकरण प्रभावकारी नभएको गुनासो गरेका छन्।
यता प्रादेशिक अस्पताल कटारीका प्रमुख चिकित्सक डाक्टर गौरव साहले अस्पतालमा नयाँ शव संरक्षण फ्रिज जडान गरिएको भए पनि विद्युत आपूर्तिको समस्या कारण उपकरण बिग्रिएको दाबी गरे। फ्रिज मर्मत भइरहेकै बेला केही व्यक्तिले शव पोस्टमार्टम कक्षबाट इमर्जेन्सीमा ल्याएर नाराबाजी गरेको र आफूमाथि गालीगौजसँगै कुटपिट प्रयास भएको उनको आरोप छ।
“शव राख्ने नयाँ फ्रिज ल्याएका थियौँ। विद्युत आउने–जाने समस्याले बिग्रिएको रहेछ। मर्मत गर्ने क्रममा भीडले पोस्टमार्टम कक्षबाट शव इमर्जेन्सीमा ल्याएर नाराबाजी गर्यो। ज्यान सुरक्षाको चिन्ताले म अस्पतालबाहिर निस्किन बाध्य भएँ,” डाक्टर साहले भने।
उनका अनुसार घटनापछि अस्पतालको सेवा समेत प्रभावित भएको थियो। प्रहरीले मृतकको शव आवश्यक कानुनी प्रक्रिया पूरा गरी प्रादेशिक अस्पताल कटारीको शवगृहमा राखिएको जनाएको छ।
प्रकाशित मिति: सोमबार, जेठ ११, २०८३ १९:४९
