विराटनगर, मोरङ । कोशी प्रदेश सरकार र प्रदेश नं १ पुनः नामाकरण संयुक्त सङघर्ष समितिवीच विहानदेखि बसेको वार्तामा पाँच बुंदे सहमती कायम भएको छ।
प्रदेश सरकार वार्ता समितिका संयोजक भौतिक पूर्वाधार विकास मन्त्री कमलप्रसाद जवेगु, पर्यटन, वन तथा वातावरणमन्त्री गणेशप्रसाद उप्रेती र सदस्य सचिव आन्तरिक मामिला तथा कानुन मन्त्रालयका सचिव लक्ष्मीप्रसाद पौडेल र संयुक्त सङ्घर्ष समितिका सदस्यहरुवीच भएको वार्तापछि उक्त्त जानकारी दिइएको हो।
सहमतीमा प्रदेशको पुनः नामारकण सम्वन्धमा सहमती हुने राजनीतिक वातावरण बनाउने एवं आन्दोलनरत पक्षबाट संविधानसम्मत राजनीतिक पहल एवं छलफल वढाउने, आन्दोलन पक्षले आन्दोलनको स्वरुप परिवर्तन गरी शान्तिपूर्ण राजनैतिक गतिविधि अगाडि वढाउने र सरकारकोतर्फबाट कुनैपनि प्रकारको बल प्रयोग नगर्ने, पहिचानको आन्दोलनको क्रममा भएका घाइतेहरुको उपचारको व्यवस्थापन, परिवारलाई क्षतिपूर्तिको व्यवस्था प्रदेश सरकारले प्रवन्ध गर्नेछ।
यस्तै अन्य सहमतीमा पहिचानको आन्दोलनको क्रममा कारागारमा रहेकाहरुको रिहाई र मुद्दा चलाईएका व्यक्तिहरुको मुद्दा फिर्ताको प्रक्रिया प्रदेश सरकारले आगाडि वढाउने र अर्को वार्ताको मिति दुवै पक्षका वार्ता समितिका संयोजकहरुकोले आपसमा समन्वय गरी फागुन १० गते भन्दा अगाडि वस्ने गरी समय र स्थान निर्धिारण गरिने निर्णय भएको छ।
वार्ता समितिका संयोजक मन्त्री जबेगुले सञ्चारकर्मीहरुसँग कुरा गर्दै वार्ताले प्रदेश सभाका सदस्यहरुले आफ्नो क्षेत्रमा राजनैतिक गतिविधि गर्न पाउनुका साथै सरकारले सहमतीलाई कार्यान्वयन गर्न अगाडि वढ्ने जानकारी दिएका हुन्।
वार्ता समितिका सदस्य मन्त्री उप्रेती वार्तापछि सरकारले संसदभित्र सहमती खोज्ने, दलहरुलाई नामाकरणमा सहमती गराउने जस्ता गतिविधि गर्ने बताए।
पुनः नामाकरण सङघर्ष समितिका अध्यक्ष डकेन्द्र सिंह थेगिमले नामाकरण विषयमा प्रदेश सभा सदस्यहरुलाई आफ्नो क्षेत्रमा बोलाउने छलफल गर्ने आन्दोलनरत पक्षले शान्तिपूर्ण गतिविधि गर्ने सहमती भएको विचार राखेका थिए।
वार्तामा पहिचान सहितको प्रदेश नं. १ पुनः नामाङकन अभियान समितिका अध्यक्ष थेगिम, किरात याक्थुङ चुम्लुङका उपाध्क्ष गोविन्दवहादुर आङबुहाङ, किरात राई यायोखाका उपाध्यक्ष युबराज राई, नेपाल आदिवासी जनजाति महासंघका महासचिब दिवस राई र नेपाल शेर्पा संघका महासचिव लाक्पा शेर्पा सहभागी थिए।
यसैगरी अन्य सहभागीहरुमा संघीय लोकतान्त्रिक राष्ट्रिय मञचका अध्यक्ष कुमार लिङदेन मिराक, लिम्बु संघ समाजबादी उपाध्यक्ष पदम लिम्बु, किराँती राष्ट्रिय मोर्चाका महासचिव अर्जुन जमेली राई, लिम्वुवान राष्ट्रिय समितिका अध्यक्ष जेन्टल लावती, राष्ट्रिय जनमुक्ति पार्टीका महासचिव पदम जबेगु र नागरिक उन्मुक्ति पार्टीका केन्द्रीय महासचिव चन्द्रकुमार चौधरी थिए।
